Ni konas la
propedeŭtikan valoron de Esperanto. Ĉu ni povos aldoni ekstran econ al tiu
valoro? Se ni rajtas kredi d’rinon Antonella Sorace el
Skotlando: jes. En artikolo de Het Parool (25-10-14) ŝi asertas, ke deinfanaĝa
dulingvismo ŝanĝas la cerbon en pozitiva maniero. Tiaj infanoj multe pli bone
komprenas kiel lingvo estas strukturita kaj tial pli facile lernas trian aŭ
kvaran lingvon. Ilia menso malfermiĝas simple ĉar ili konscias, ke oni povas
nomumi la saman objekton du-maniere. Krome dulingvaj infanoj scias, ke eblas
havi diferencan perspektivon al aĵoj – ankaŭ ekster la lingvo. En nia hodiaŭa
socio tiu kompreno pri pluraj perspektivoj estas grava por krei respekton kaj
toleron.
Antonella Sorace
estas profesorino pri evolulingvistiko de la Universitato de Edinburgo. En ŝia
esplorado ŝi koncentriĝas precipe je dulingvismo. Ŝi nepre ne kredas, ke estas
bona evoludirekto ke la angla monde pli kaj pli graviĝas. Ŝi referencas al la
fakto, ke regionaj lingvoj estas malpli aprezitaj. Malprave. Dulingvismo povas
esti ankaŭ la regado de regiona lingvo kaj nacia lingvo. Dialektoj certe
valoras. Superrego de la angla povas rezulti en la kredo ke la propra
(nederlanda) lingvo estas malpli utila. Britoj estas grandparte unulingvaj kaj
oni povas facile konstati la konsekvencojn de tio.
Antonella Sorace
estas fondinto kaj direktoro de Bilingualism Matters (dulingvismo gravas),
centro por dulingvismo. Ĝia mesaĝo estas ke ĉiuj lingvoj estas utilaj. Grave
estas havi pli ol unu lingvo en la cerbo, ne kiom da homoj ĝin parolas.
Kompreneble gravas alirilate, sed ne por la persona evoluo. BM dumtempe estiĝis
eŭropa retejo. Antaŭ mallonge ĝi malfermis en Nederlando filion (la 12-an). Oni
organizas prelegojn, seminariojn, esplorojn kaj kunlaborojn. La celgrupo
konsistas el ĉiuj sektoroj de la socio: instruistoj, sanspecialistoj,
strategiistoj, gepatroj, entreprenoj. Ĉu ne kunlaboroportuno por la
Esperanto-movado? Laŭ mi Esperanto povus grave roli en la strebado de BM!
Skribita
de Kees Ruig
Nenhum comentário:
Postar um comentário